Question 1

რა განსხვავებაა ფსიქიატრსა და ფსიქოლოგს შორის?

Accepted Answer

ფსიქიატრი არის ექიმი, სამედიცინო განათლებით, სვამს დიაგნოზს და საჭიროების შემთხვევაში ნიშნავს მედიკამენტურ მკურნალობას. ფსიქოლოგი მუშაობს მხოლოდ ფსიქოთერაპიული მეთოდებით და არ ნიშნავს წამლებს.

Question 2

ფსიქიკური აშლილობა გენეტიკურია?

Accepted Answer

გენეტიკა მედიცინაში მეტად მნიშვნელოვანია, თუმცა ის არ არის განაჩენი. გენეტიკურმა განწყობამ არ უნდა შეგვაშინოს, პირიქით უნდა გავითვალისწინოთ მკურნალობის პროცესში და სწორად გამოვიყენოთ მკურნალობის დაგეგმვის პროცესში.

Question 3

ფსიქიკური აშლილობა სირცხვილია?

Accepted Answer

არა. ეს არის ბიოლოგიური და ფსიქოლოგიური პროცესების ერთობლიობა, ისევე როგორც დიაბეტი ან ჰიპერტენზია. სტიგმის მოხსნა წარმატებული მკურნალობის პირველი ნაბიჯია.

Question 4

შესაძლებელია თუ არა ფსიქიკური პრობლემის სრული განკურნება?

Accepted Answer

ტერმინები „მკურნალობა" და „განკურნება" ხშირად აირია. ბევრი მდგომარეობა სრულად იკურნება, ხოლო ქრონიკული პროცესების დროს თანამედროვე მართვა საშუალებას გვაძლევს მივაღწიოთ მდგრად რემიზიას.

Question 5

არის თუ არა კონფიდენციალურობა დაცული?

Accepted Answer

დიახ, პაციენტის შესახებ ნებისმიერი ინფორმაცია წარმოადგენს სამედიცინო საიდუმლოებას. ინფორმაციის გაცემა მესამე პირზე ხდება მხოლოდ კანონით გათვალისწინებულ უკიდურეს შემთხვევებში ან თავად პაციენტის წერილობითი თანხმობით.

Question 6

„დიაგნოზი იარლიყია, რომელიც მთელი ცხოვრება დამრჩება?"

Accepted Answer

არა. დიაგნოზი მედიცინაში არის არა „იარლიყი", არამედ სამუშაო ინსტრუმენტი, რომელიც ექიმს ეხმარება მკურნალობის სწორი ტაქტიკის შერჩევაში. ბევრი ფსიქიკური მდგომარეობა ტრანზიტორულია (დროებითი) და ადეკვატური მკურნალობის შემდეგ დიაგნოზი კარგავს აქტუალობას.

Question 7

იწვევს თუ არა ანტიდეპრესანტები დამოკიდებულებას?

Accepted Answer

თანამედროვე ანტიდეპრესანტები (SSRI, SNRI) არ იწვევენ ნარკოტიკულ დამოკიდებულებას. მათი მოხსნა ხდება ეტაპობრივად, ექიმის მეთვალყურეობის ქვეშ.

Question 8

შემიძლია თუ არა ალკოჰოლის მიღება მკურნალობის დროს?

Accepted Answer

მკურნალობის პროცესში ალკოჰოლის მიღება არ არის რეკომენდებული, რადგან მან შეიძლება გააძლიეროს გვერდითი მოვლენები ან შეამციროს მედიკამენტის ეფექტურობა.

Question 9

მოვიმატებ თუ არა წონაში წამლების მიღებისას?

Accepted Answer

ზოგიერთმა პრეპარატმა შესაძლოა იმოქმედოს მადაზე, თუმცა თანამედროვე მედიცინაში არსებობს მრავალი ალტერნატივა, რომლებიც მეტაბოლიზმზე გავლენას არ ახდენს. ექიმი ყოველთვის ინდივიდუალურად არჩევს წამალს.

Question 10

სამუდამოდ მომიწევს წამლების სმა?

Accepted Answer

არა. მკურნალობის კურსი ინდივიდუალურია. ბევრ შემთხვევაში, მდგომარეობის დასტაბილურების შემდეგ, მედიკამენტების მიღება ეტაპობრივად წყდება.

Question 11

ცვლის თუ არა წამალი პიროვნებას?

Accepted Answer

არა. მედიკამენტები მოქმედებს სიმპტომებზე (შფოთვაზე, უძილობაზე, აპათიაზე) და არა თქვენს პიროვნულ ღირებულებებზე. მკურნალობის მიზანია დაგაბრუნოთ თქვენს ბუნებრივ მდგომარეობაში.

Question 12

რა მედიკამენტებით ხდება თქვენს ცენტრში მკურნალობა?

Accepted Answer

ჩვენს ცენტრში მკურნალობა ხდება უმაღლესი საერთაშორისო სტანდარტებით. მინიმალურად გამოიყენება ისეთი მედიკამენტები (მაგ. ბენზოდიაზეპინები), რომლებიც იწვევენ დამოკიდებულებას.

Question 13

რამდენ ხანში იწყებს მოქმედებას ანტიდეპრესანტი?

Accepted Answer

ანტიდეპრესანტის სრული ეფექტის გამოვლენას სჭირდება 2-4 კვირა, ზოგჯერ 6-8 კვირაც. პირველ კვირებში შეიძლება გაუმჯობესდეს ძილი და მადა, ხოლო გუნება-განწყობის გაუმჯობესება მოგვიანებით მოხდება.

Question 14

რა გვერდითი მოვლენები აქვს ანტიდეპრესანტებს?

Accepted Answer

პირველი 1-2 კვირის განმავლობაში შეიძლება გამოვლინდეს: გულისრევა, თავის ტკივილი, უძილობა ან ძილიანობა, მადის ცვლილება. ეს მოვლენები ჩვეულებრივ თავისით გადის.

Question 15

შეიძლება თუ არა ანტიდეპრესანტის დამოუკიდებლად შეწყვეტა?

Accepted Answer

არა, კატეგორიულად არ არის რეკომენდებული. უეცარმა შეწყვეტამ შეიძლება გამოიწვიოს: თავბრუსხვევა, გრიპისმაგვარი სიმპტომები, უძილობა, შფოთვა და დეპრესიის დაბრუნება. მიღების შეწყვეტა უნდა მოხდეს ექიმის მეთვალყურეობით.

Question 16

რა არის ფსიქოთერაპია?

Accepted Answer

ფსიქოთერაპია მუშაობს ფსიქოლოგიურ და ქცევით დონეზე. მისი სამიზნეა აზროვნების პატერნები, ემოციური რეაქციები და ქცევითი ჩვევები. თერაპია პაციენტს აძლევს ინსტრუმენტებს, რათა მან თავად შეძლოს სტრესთან გამკლავება.

Question 17

ფსიქოთერაპია თუ მედიკამენტური მკურნალობა?

Accepted Answer

წამალი მკურნალობს ორგანოს (ტვინს), ხოლო ფსიქოთერაპია მკურნალობს პიროვნებას. ჩვენი მიზანია, არა მხოლოდ სიმპტომი მოვხსნათ, არამედ პაციენტს ცხოვრების ხარისხი დავუბრუნოთ.

Question 18

რამდენი ხანი გრძელდება ფსიქოთერაპიის კურსი?

Accepted Answer

ეს დამოკიდებულია პრობლემის სირთულეზე. მოკლევადიანი თერაპია (მაგ. კოგნიტურ-ბიჰევიორული) ჩვეულებრივ 8-16 სესიას მოიცავს. უფრო ღრმა, პიროვნებაზე ორიენტირებული თერაპია შეიძლება წლებიც გაგრძელდეს.

Question 19

ემართებათ თუ არა დეპრესია „ძლიერ" ადამიანებს?

Accepted Answer

დეპრესია არ არის ნებისყოფის სისუსტე; ეს არის ბიოლოგიური პროცესი, დაკავშირებული ნეირომედიატორების დისბალანსთან. ის შეიძლება დაემართოს ნებისმიერს.

Question 20

როგორ გავიგო, დეპრესია მაქვს თუ უბრალოდ ცუდ ხასიათზე ვარ?

Accepted Answer

ჩვეულებრივი ცუდი განწყობა რამდენიმე დღეში გადის. დეპრესია კი გრძელდება 2 კვირაზე მეტ ხანს და ახასიათებს: მუდმივი დათრგუნულობა, ინტერესის დაკარგვა, ძილის დარღვევა, მადის ცვლილება, ენერგიის დაკარგვა.

Question 21

შეიძლება თუ არა დეპრესია თავისით გაიაროს?

Accepted Answer

მსუბუქი დეპრესიული ეპიზოდი შეიძლება თავისით გაიაროს, მაგრამ ეს სარისკოა. მკურნალობის გარეშე დეპრესია ხშირად ქრონიკული ხდება. პაციენტების 80% სრულად იკურნება პროფესიონალური დახმარებით.

Question 22

რა კავშირია უძილობასა და დეპრესიას შორის?

Accepted Answer

უძილობა და დეპრესია მჭიდროდ არის დაკავშირებული. დეპრესიის მქონე პაციენტების 75%-ს ძილის პრობლემები აქვს. ქრონიკულმა უძილობამ შეიძლება გამოიწვიოს დეპრესია.

Question 23

რა არის შფოთვითი აშლილობა?

Accepted Answer

შფოთვითი აშლილობა ხასიათდება: მუდმივი, გადაჭარბებული წუხილით; ფიზიკური სიმპტომებით; ყოველდღიური ფუნქციონირების დარღვევით. თუ შფოთვა 6 თვეზე მეტ ხანს გრძელდება — მიმართეთ სპეციალისტს.

Question 24

რა არის პანიკური შეტევა და საშიშია თუ არა?

Accepted Answer

პანიკური შეტევა არის შიშის მწვავე ეპიზოდი, რომელიც 10-15 წუთში პიკს აღწევს. მიუხედავად საშინელი შეგრძნებისა, პანიკური შეტევა სიცოცხლისთვის საშიში არ არის და იკურნება.

Question 25

ობსესია (აკვიატება) ყოველთვის დაავადებაა?

Accepted Answer

აკვიატებული აზრები მცირე დოზით ბევრ ადამიანს აქვს. თუმცა, თუ ობსესიები ინტრუზიულია, იწვევს დიდ შფოთვას და გართმევთ დროს, ეს შეიძლება მიუთითებდეს ობსესიურ-კომპულსიურ აშლილობაზე (OCD).

Question 26

რა არის ჰიპოქონდრია?

Accepted Answer

ჰიპოქონდრია არის მდგომარეობა, როდესაც ადამიანს აქვს გადამეტებული შიში იმისა, რომ სჭირს რაიმე მძიმე დაავადება, მიუხედავად ნორმალური კვლევის შედეგებისა.

Question 27

რატომ არის საჭირო ზუსტი დიაგნოზი?

Accepted Answer

ზუსტი დიაგნოზი მკურნალობის ეფექტურობის ფუნდამენტია. მაგალითად, დეპრესიისა და ბიპოლარული აშლილობის დეპრესიული ფაზის მკურნალობა რადიკალურად განსხვავდება.

Question 28

ყურადღების დეფიციტი ყოველთვის ADHD-ს ნიშნავს?

Accepted Answer

არა აუცილებლად. ყურადღების კონცენტრაციის სირთულე შეიძლება ახლდეს დეპრესიას, შფოთვას, ფარისებრი ჯირკვლის პრობლემებს ან უძილობას. ADHD სპეციფიკური ნეიროგანვითარებითი მდგომარეობაა, რომელსაც კომპლექსური დიაგნოსტიკა სჭირდება.

Question 29

როდის უნდა მივმართო ფსიქიატრს?

Accepted Answer

ფსიქიატრს უნდა მიმართოთ, თუ: 2 კვირაზე მეტი ხნის განმავლობაში გაწუხებთ დათრგუნულობა ან შფოთვა; გაქვთ ძილის მძიმე დარღვევები; განიცდით პანიკურ შეტევებს; ვერ უმკლავდებით ყოველდღიურ საქმიანობას ემოციური მდგომარეობის გამო.

Question 30

რა ასაკიდან შეიძლება ბავშვს ფსიქიატრთან წაყვანა?

Accepted Answer

ნებისმიერ ასაკში, საჭიროების შემთხვევაში. ბავშვთა ფსიქიატრი მუშაობს ჩვილებიდან მოზარდებამდე.

Question 31

კონფიდენციალურია თუ არა ფსიქიატრთან ვიზიტი?

Accepted Answer

დიახ, აბსოლუტურად. სამედიცინო კონფიდენციალობა კანონით არის დაცული. ექიმს არ აქვს უფლება თქვენი თანხმობის გარეშე ვინმეს მისცეს ინფორმაცია.

Question 32

როგორ მოქმედებს ძილი ფსიქიკურ ჯანმრთელობაზე?

Accepted Answer

ძილი არის ტვინის „რესტარტი". მისი ქრონიკული ნაკლებობა პირდაპირ კავშირშია შფოთვის, დეპრესიისა და გაღიზიანებადობის მატებასთან.

Question 33

რა არის უხარისხო ძილის მთავარი ნიშანი?

Accepted Answer

მთავარი ნიშანია დღის განმავლობაში გამოხატული ძილიანობა, დაღლილობის შეგრძნება გაღვიძებისთანავე, ყურადღების გაფანტულობა და გაღიზიანებადობა.

Question 34

რამდენი საათი ძილია ნორმა?

Accepted Answer

ზრდასრული ადამიანისთვის ოპტიმალურია 7-9 საათი უწყვეტი ძილი. თუმცა, მნიშვნელოვანია ინდივიდუალური მოთხოვნილება.

Question 35

რატომ მიჩქარდება გული უმიზეზოდ?

Accepted Answer

გულისცემის უეცარი აჩქარება, რომელსაც თან არ ახლავს ფიზიკური დატვირთვა, ხშირ შემთხვევაში ფსიქოგენური წარმოშობისაა. შფოთვის ან პანიკური შეტევის დროს ადრენალინის მომატება იწვევს ტაქიკარდიას (გულისცემის გახშირებას), რაც თავისთავად საშიში არ არის, თუმცა ძალიან შემაშფოთებელი შეგრძნებაა. მნიშვნელოვანია კარდიოლოგიური მიზეზების გამორიცხვა, რის შემდეგაც ფსიქიატრი დაგეხმარებათ შფოთვის მართვაში.

Question 36

გულის ფრიალი და ჰაერის უკმარისობა — რა შეიძლება იყოს მიზეზი?

Accepted Answer

ამ ორი სიმპტომის ერთობლიობა პანიკური შეტევის კლასიკური გამოვლინებაა. სტრესის პასუხად ორგანიზმი „ბრძოლა ან გაქცევა" რეჟიმში გადადის — გული ჩქარდება, სუნთქვა ზედაპირული ხდება, ჩნდება ჰაერის უკმარისობის შეგრძნება. ეს არის ფუნქციური (არა ორგანული) მდგომარეობა, რომელიც კარგად ემორჩილება მკურნალობას.

Question 37

სუნთქვის გაძნელება სტრესის დროს — ნორმალურია?

Accepted Answer

დიახ, ეს გავრცელებული ფსიქოსომატიკური რეაქციაა. სტრესის დროს ვეგეტატიური ნერვული სისტემა აქტიურდება, რაც სუნთქვის პატერნს ცვლის — სუნთქვა ხდება ზედაპირული და ხშირი (ჰიპერვენტილაცია). ეს თავისთავად იწვევს თავბრუსხვევას, ხელ-ფეხის დაბუჟებას და შფოთვის გაძლიერებას. სუნთქვის სავარჯიშოები და შფოთვის მკურნალობა ეფექტურად აგვარებს პრობლემას.

Question 38

გულმკერდის ტკივილი ნერვიულობისას — გულის პრობლემაა თუ სტრესი?

Accepted Answer

გულმკერდის ტკივილი ერთ-ერთი ყველაზე შემაშფოთებელი სიმპტომია. თუმცა, 40 წლამდე ასაკის ადამიანებში ეს უმეტეს შემთხვევაში სტრესთან არის დაკავშირებული: კუნთების დაჭიმულობა, ჰიპერვენტილაცია ან პანიკური შეტევა. აუცილებელია ჯერ კარდიოლოგიური გამოკვლევა, რის შემდეგაც ფსიქოსომატიკური მიზეზის დადგენა და მკურნალობა შესაძლებელია.

Question 39

წნევის მატება ნერვიულობისას — რატომ ხდება და რა ვქნა?

Accepted Answer

სტრესი და შფოთვა აქტიურებს სიმპათიკურ ნერვულ სისტემას, რაც დროებით ზრდის არტერიულ წნევას. ქრონიკული სტრესის პირობებში ეს პროცესი მუდმივი ხდება და რეალური ჰიპერტენზიის რისკს ზრდის. ფსიქიატრიული მკურნალობა ამ შემთხვევაში არა მხოლოდ შფოთვას ამცირებს, არამედ კარდიოვასკულარულ ჯანმრთელობასაც იცავს.

Question 40

ვერ ვიძინებ ღამით — რა მიზეზი შეიძლება ჰქონდეს?

Accepted Answer

უძილობის უკან ხშირად ფსიქიკური ფაქტორებია: შფოთვა, დეპრესია, პოსტტრავმული სტრესი ან ქრონიკული სტრესი. ტვინი „ვერ გამოირთვება", აზრები ბრუნავს, ადრენალინი არ ეცემა. უძილობა თავისთავად აუარესებს ფსიქიკურ მდგომარეობას — იქმნება მანკიერი წრე. პროფესიონალური მკურნალობა (კოგნიტურ-ბიჰევიორული თერაპია უძილობისთვის + საჭიროების შემთხვევაში მედიკამენტი) 80-90%-ში ეფექტურია.

Question 41

ქრონიკული დაღლილობა — რატომ ვარ მუდმივად დაღლილი?

Accepted Answer

მუდმივი დაღლილობის შეგრძნება, რომელიც დასვენებით არ გადის, ხშირად ფსიქიკური მდგომარეობის ნიშანია. დეპრესია, ქრონიკული სტრესი და პროფესიული გადაწვა (ბერნაუთი) ამცირებენ ენერგიას ფიზიკურ დონეზე. მნიშვნელოვანია ფარისებრი ჯირკვლის, სისხლის ანალიზის და სხვა ორგანული მიზეზების გამორიცხვა, რის შემდეგაც ფსიქიატრიული შეფასება სწორ დიაგნოზს და მკურნალობას მისცემს.

Question 42

ღამით ვიღვიძებ და ვეღარ ვიძინებ — რა ვქნა?

Accepted Answer

ღამის გაღვიძება (განსაკუთრებით 3-4 საათზე) და ხელახლა დაძინების შეუძლებლობა დეპრესიისა და შფოთვის ხშირი სიმპტომია. კორტიზოლის (სტრეს-ჰორმონის) დარღვეული ციკლი იწვევს ადრეულ გაღვიძებას. თვითმკურნალობა (საძილე საშუალებები აფთიაქიდან) პრობლემას ვერ მოაგვარებს — საჭიროა მიზეზის მკურნალობა.

Question 43

ძილში შეშინება და გაღვიძება — რატომ ხდება?

Accepted Answer

ძილში უეცარი გაღვიძება შიშის შეგრძნებით, ღამის კოშმარები ან ღამის პანიკური შეტევები ხშირად პოსტტრავმული სტრესული აშლილობის (PTSD) ან გენერალიზებული შფოთვის სიმპტომებია. ტვინი ძილის დროსაც „ფხიზლობს" საფრთხეების მოლოდინში. EMDR თერაპია და სპეციფიკური მედიკამენტები ეფექტურად ამცირებენ ამ სიმპტომებს.

Question 44

კუჭის ტკივილი ნერვიულობისას — შეიძლება სტრესით იყოს გამოწვეული?

Accepted Answer

აბსოლუტურად. კუჭ-ნაწლავის ტრაქტს „მეორე ტვინს" უწოდებენ — მას აქვს საკუთარი ნერვული სისტემა, რომელიც უშუალოდ რეაგირებს სტრესზე. ნერვიულობა ზრდის მარილმჟავის გამოყოფას, იწვევს კუჭის სპაზმებს, გულისრევას. ქრონიკულმა სტრესმა შეიძლება გამოიწვიოს გასტრიტი ან გაღიზიანებული ნაწლავის სინდრომი.

Question 45

გაღიზიანებული ნაწლავის სინდრომი და სტრესი — რა კავშირია?

Accepted Answer

გაღიზიანებული ნაწლავის სინდრომი (IBS) პაციენტების 60-70%-ს თანმხლები შფოთვითი ან დეპრესიული აშლილობა აქვს. სტრესი აქტიურებს ნაწლავის მოტორიკას, იწვევს შებერილობას, ტკივილს და დიარეას/ყაბზობას. ფსიქიატრიული მკურნალობა (ანტიდეპრესანტები დაბალ დოზებში + კოგნიტურ-ბიჰევიორული თერაპია) ეფექტურად ამცირებს როგორც ნაწლავის, ისე ფსიქიკურ სიმპტომებს.

Question 46

გულისრევა შფოთვის დროს — ნორმალურია?

Accepted Answer

დიახ, გულისრევა შფოთვის ძალიან გავრცელებული ფიზიკური გამოვლინებაა. სტრესი აქტიურებს ვაგუსის ნერვს, რომელიც კუჭის ფუნქციას მართავს. შედეგად ჩნდება გულისრევა, მადის დაკარგვა, „კუჭის შეკვრის" შეგრძნება. ეს სიმპტომი ქრება შფოთვის სათანადო მკურნალობის შემდეგ.

Question 47

თავის ტკივილი სტრესის გამო — როგორ განვასხვავო შაკიკისგან?

Accepted Answer

დაძაბვის ტიპის თავის ტკივილი (tension headache) ყველაზე გავრცელებული ფორმაა და პირდაპირ კავშირშია სტრესთან. ის ხასიათდება ორმხრივი, მჭიმავი ტკივილით, „სალტისმაგვარი" შეგრძნებით. შაკიკი კი ჩვეულებრივ ცალმხრივია, პულსირებადი, თან ახლავს გულისრევა და სინათლის აუტანლობა. ქრონიკული სტრესის მკურნალობა მნიშვნელოვნად ამცირებს თავის ტკივილის სიხშირეს.

Question 48

თავბრუსხვევა და სისუსტე — რა კავშირი აქვს შფოთვასთან?

Accepted Answer

შფოთვა იწვევს ჰიპერვენტილაციას (ზედმეტად ხშირ სუნთქვას), რაც სისხლში CO₂-ის დონეს ამცირებს. შედეგად ჩნდება თავბრუსხვევა, სისუსტე, „ნისლიანი" შეგრძნება. ეს სიმპტომები თავისთავად ზრდის შფოთვას — ადამიანს ეშინია, რომ „გონებას კარგავს". მნიშვნელოვანია ვესტიბულარული და ნევროლოგიური მიზეზების გამორიცხვა, რის შემდეგაც შფოთვის მკურნალობა სიმპტომებს მოხსნის.

Question 49

ხელ-ფეხის დაბუჟება და კანკალი — რატომ ხდება სტრესის დროს?

Accepted Answer

ეს პარესთეზია (დაბუჟების შეგრძნება) და ტრემორი (კანკალი) სტრესის დროს ხშირი ფიზიკური პასუხია. ჰიპერვენტილაციის შედეგად სისხლში კალციუმის იონების ბალანსი იცვლება, რაც კიდურების დაბუჟებას იწვევს. ადრენალინის მომატება კი კანკალს. ეს სიმპტომები სრულიად უვნებელია, თუმცა პირველად ნევროლოგიური კონსულტაცია რეკომენდებულია.

Question 50

ჭარბი ოფლიანობა სტრესის დროს — ეს ნორმალურია?

Accepted Answer

სტრესული ოფლიანობა (განსხვავებით თერმული ოფლიანობისგან) ძირითადად ხელისგულებს, ფეხისგულებს და იღლიებს ეხება. ეს სიმპათიკური ნერვული სისტემის აქტივაციის ნორმალური შედეგია. თუმცა, თუ ოფლიანობა ყოველდღიური პრობლემაა და სოციალურ ფუნქციონირებას უშლის ხელს, შესაძლოა სოციალური შფოთვა ან გენერალიზებული შფოთვითი აშლილობა იყოს მიზეზი.

Question 51

კისრისა და ბეჭის ტკივილი სტრესისგან — შეიძლება ფსიქოსომატიკური იყოს?

Accepted Answer

დიახ, ეს ერთ-ერთი ყველაზე გავრცელებული ფსიქოსომატიკური სიმპტომია. ქრონიკული სტრესი იწვევს ტრაპეციული კუნთებისა და კისრის კუნთების მუდმივ დაჭიმულობას, რაც ტკივილს, სიმძიმეს და მოძრაობის შეზღუდვას იწვევს. მასაჟი და ტკივილგამაყუჩებელი დროებით ხსნის პრობლემას, მაგრამ მიზეზის — სტრესის — მკურნალობის გარეშე ტკივილი ბრუნდება.

Question 52

მუდმივი „გუნდა ყელში" — რა არის ეს შეგრძნება?

Accepted Answer

ეს მდგომარეობა სამედიცინო ლიტერატურაში „გლობუს ფარინგეუსის" სახელითაა ცნობილი — ყელში რაღაცის „გაჩერების" შეგრძნება, რომელიც ყლაპვას არ უშლის ხელს. პაციენტების 96%-ში ორგანული მიზეზი არ დგინდება. ეს სიმპტომი მჭიდროდ უკავშირდება შფოთვას, დეპრესიას და სტრესს. შფოთვის მკურნალობა, როგორც წესი, ამ შეგრძნებასაც აქრობს.

Question 53

ვერ ვიკონცენტრირებ და მეხსიერება გამიუარესდა — ეს ნორმალურია?

Accepted Answer

კონცენტრაციისა და მეხსიერების პრობლემები ხშირად ფსიქიკური მდგომარეობების სიმპტომია, არა „ასაკთან დაკავშირებული" პროცესი. დეპრესია, შფოთვა, ქრონიკული უძილობა და ADHD — ყველა ეს მდგომარეობა მნიშვნელოვნად აუარესებს კოგნიტურ ფუნქციებს. სწორი დიაგნოზი და მკურნალობა ამ სიმპტომებს მნიშვნელოვნად აუმჯობესებს.

Question 54

წონაში მომატება ან დაკლება სტრესის დროს — რატომ?

Accepted Answer

სტრესი ორმხრივად მოქმედებს წონაზე. ქრონიკული სტრესი ზრდის კორტიზოლის დონეს, რაც მადას ზრდის (განსაკუთრებით ტკბილისა და ცხიმიანი საკვებისადმი) და ვისცერალური ცხიმის დაგროვებას უწყობს ხელს. მეორე მხრივ, მწვავე სტრესი და დეპრესია შეიძლება მადის მკვეთრ დაკარგვას და წონის ვარდნას გამოიწვიოს. ორივე შემთხვევაში ფსიქიკური მიზეზის მკურნალობა ნორმალურ წონას აღადგენს.

ვიდეო რესურსები:

ხშირად დასმული კითხვები